منتديات الكافيه
عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي


منتديات الكافيه كل ما تتمناه  
الرئيسيةالبوابهاليوميةمكتبة الصورس .و .جبحـثالتسجيلدخولتسجيل دخول الاعضاء

شاطر | 
 

 بعد كله ده ....جنون الازمات

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
~*شمس الإسلام*~
المدير العام
المدير العام


الجنس : انثى
البلد :
العمر : 24
المهنه :
الحاله :
عدد المساهمات : 1284
نقاط : 14978
تاريخ التسجيل : 18/02/2010

مُساهمةموضوع: بعد كله ده ....جنون الازمات   الثلاثاء أكتوبر 12, 2010 10:52 pm

بسم الله الرحمن الرحيم
النهاردة وانا راجعة من الجامعة مشوار كده مية مية ربنا ما يوريكوا
طبعا ساعة واقفين فى الشمس لحد اما الواحد بدا يحس ان الميه اللى بتنزل من دماغه ده مخه اللى ساح من النار
وتبص حواليك تلاقى كل اللى حواليك حاطين كتاب فوق دماغهم واللى تعبوا اووى اتحايلوا على نفسهم بشمسية ولموا اصحابهم حواليها
طبعا اما ييجى الاتوبيس اللى انت عاوزه فاكر نفسك وحدك اللى هتركب او اقصاها انت والجروب اللى معاك ........
لالالالالا فوق ده فى حوالى 3 مليون منتظرين
ياااااااااااااه اخيرا ركبنا
طبعا هتلاقى اللى يقولك ادخل جوه فاضى
تلاقى فى عبارة عن مساحة تكاد تكفى لمساحة قدم
المهم ركبنا واطمنا اننا ان شاء الله هنتحرك مع الاتوبيس
طبعا متحلمش انك لو تعبان اوووى وانتى بنت مثلا حد هيقوملك
المهم كنا حوالى 8 واحد وقف
واحدة قعدت وكل الشنط والكتب على رجلها يعينى وكمان اللى ساند عليها بكل حمله اللى هو انا طبعا
واحد بيتكلم بيقول عن صاحبه اللى سافر استراليا وتزوج هناك واخد الجنسية وحياته فل هناك
صاحبه بيقوله بس برضك المصريين احلى
رد عليه :ياعم كفايه الجنسية انك تاخدها
قاله انا بس الاقيلى اى سفرية لهناك
ولا اى حته بره مصر .......
طبعا ده واضح انه راى الامة كلها
طول ما انت فى العربيه الناس تشتم بعض وتمسك فى بعض محدش طايق ذبابة رزله تلف عليه عاوز يتخانق
بيخرج من بيته وهو بيقول مين هيقابلنى علشان اتخانق معاه واطلع كل اللى عاوزه فيه هاااااااا
ده بقى حال المصريين خاصة هنا فى العاصمة
طبعا وانت راكب الباص الرائع شايف الملاكى بيمشى والشبابيك مقفولة ((مكيف طبعا))
بس لو فكرت تعد كل الملاكى وتعد ركاب الباص تلاقى ان ركاب الباص يفوق كل الملاكى اللى فى الشارع الاف المرات
ده غير لو حد من الكبار فكر يخرج من بيته صباحا بقى اضمن ساعة تاخير ولو جدع فرغ نص شحنتك ...طبعا بتكتم لاقصى حد
والله بيصعبوا عليا ايه اللى مصحيهم بدرى كده ؟؟؟
المهم طبعا الرغى ده كله وجع دماغكم انا كله ده جال بخاطرى لما قرات المقال المستفز ده
علما بان الجامعة فى مدينة نصر يعنى من انضف الاماكن فى مصر .........يعنى على الاقل يكون فيه توصيه فى الباصات
بس يلا
اترككم مع المقال اللى عاوزة اعرف ارائكم فيه





مش مهم انك تغير الكون... المهم انك تخلي الكون ما يغيركش
"أسأل كثيرا لماذا
أشعر بالسعادة فقط عندما أتكلم إلي نفسى, و عرفت بعد فترة أن سبب الراحة
هو كونى الشخص الوحيد الذى تريحنى إجاباته"
الرجوع الى أعلى الصفحة اذهب الى الأسفل
~*شمس الإسلام*~
المدير العام
المدير العام


الجنس : انثى
البلد :
العمر : 24
المهنه :
الحاله :
عدد المساهمات : 1284
نقاط : 14978
تاريخ التسجيل : 18/02/2010

مُساهمةموضوع: رد: بعد كله ده ....جنون الازمات   الثلاثاء أكتوبر 12, 2010 10:53 pm

بيان التنحي
بقلم: طارق عبد المعز

لأ لأ ماحدش يفهمني غلط. انا لا رحت مكتب أمن الدولة ولا اتقرصت في وداني ولا جاني تهديد من جانب أي حد لا سمح الله. إنها الحقيقة العارية البلبوص التي أدركتها بعد سنوات التيه والضياع في بحر إبراهيم عيسى ووائل الإبراشي ومنى الشاذلي ومعتز الدمرداش ومحمود سعد. لقد انجلت الغشاوة من على بصيرتي وهاأنذا أعلن من منبري هنا من الرياض الحبيبة التي هاجرت إليها باختياري ورغبتي منذ ثلاث سنوات، أنني أتنحى تمامًا ونهائيًا عن الاهتمام بالشأن العام المصري ومتابعة ما يجري على لسان الفضائيات الخاصة والعامة وما تكتبه جرائد المعارضة والمستقلة ، وأن أعود إلى صفوف المصريين النابهين أجمع المال واعزل نفسي عن كل ما يدور حولي مثلي مثل أي مصري آخر مقيم في كومباوند مغلق في القطامية هايتس أو أكتوبر والشيخ زايد أو مدينتي والرحاب والقاهرة الجديدة.

لقد اكتشفت أيها الإخوة أننا نحن المصريون المقيمون في الخارج بلهاء وقليلي الذكاء فبدلًا من أن نركز جهودنا في جمع المال والإكثار منه تحسبًا للأيام التي لا يعلم إلا الله كيف ستكون إذا عدنا إلى بلدنا للتقاعد قبل الحصول على باسبور كندي أو أسترالي أو نيوزلندي (لا قدر الله) ، بدلًا من ذلك نستغل أوقات الفراغ القليلة في الاهتمام بالشأن العام ورفع الضغط والسكر والكولسترول بالمناقشات العقيمة والبكاء على أحوال مصر واللي جرالها، بينما عندما زرت مصر في إجازتي الأخيرة وجدت المصريين على النقيض التام من ذلك كله، ولربما خضنا في مقال آخر عن سبب اهتمام المغتربين بالوطن أكثر من اللازم، لكن دعوني أصف لكم كيف كان شكل الثمانين مليون داخل الوطن.

هل المصريين بيستعبطوا؟ هل المصريين كهنة وبيدّعوا الفقر؟ آه هما فعلا كهنة وبيستعبطوا لأن السيارات السيراتو ذات المائة ألف جنيه أصبحت السيارة الشعبية الأولى في مصر ويمكن أن تقول بملء فمك أنها أخذت مكان الفيات بأرقامها 128 و127 الهاتشباك. إذا وقفت في شارع الملك فيصل، وهو شارع عشوائي يلعن كل ساكن فيه الساعة التي جعلته يسكن بالقرب منه، إذا وقفت في ذلك الشارع دقيقة واحدة ستمر أمامك على الأقل عشر سيارات سيراتو ماشاء الله تبارك الله. سألت موظف محترم في سوبرماركت بنزينة شل هو أيه حكاية العربية السيراتو في مصر؟ قاللي كل العربيات دي قسط يابيه، سألته وياترى قسطها يعمل كام؟ قاللي: ألفين ألفين ونص، كبرت وهللت الله الله الله كل دول ماشاء الله مرتباتهم بتعدي الست آلاف جنيه وبيدفعوا القسط بسهولة كده قاللي: ده نصهم كمان موظفين في الحكومة ! ...إذن يبقى كلام أحمد عز وجمال مبارك صح، يبقى فعلًا فيه تنمية في البلد والناس اتزبطت. أمال الناس في مصربتصرخ ليه لما تلاقي كيلو اللحمة بستين جنيه؟ وما فيش بيت فيكي يا مصر دخلته مالقيتش فيه لحمة على السفرة!!
التقسيط الآن ملأ بيوت المصريين بأرقي أثاث وأفخم ديكورات وأكسسورات وأحدث أجهزة منزلية والكترونية، وبالطبع ملأ شوارع المصريين بأحدث العربيات على الزيرو، حتى السياحة بقت بالتقسيط، وكل ما أتصل بواحد صاحبي عشان نتقابل اللي يقوللي معلهش مش فاضي أصلي طالع تركيا أعمل شوبنج الأسبوع الجاي، والثاني يقوللي أنا في ماليزيا مع المدام بنجدد شهر العسل، واللي يقوللي أصلي لسه راجع من اسبانيا وهلكان. أما اللي وقته (مش جيبه) مايسمحش يسافر بره بيأجر أسبوع في الساحل، بأعيد وأؤكد إني بأتكلم عن أصحابي ولاد الطبقة المتوسطة ، لأن طبقة موظفي الحكومة والقطاع العام "المعدمين" بيصيفوا في أسكندرية ومرسى مطروح. الصدمة الكبرى إن أم عزة اللي ساكنة فوق سطوح بيتنا بقالها ثلاث سنين كل سنة بتصيف في نيو جيرسي عند ابنها المقيم هناك بصورة غير شرعية من سبع سنوات ... وبتحكي للجيران إن لولا عزة وأخواتها الصغار لسه في المدارس كانت قعدت في أمريكا على طول!!
بلاش العربيات والعفش والسفر، تعالى نتكلم عن الدروس الخصوصية، أصدقائي وقرايبي بيحلفوا أن أي أسرة لديها 3 أطفال في المدارس الحكومية لن يتكلفوا أقل من عشرة آلاف جنية في السنة دروس، تتضاعف 3 مرات لو إن أحد العيال في الثانوية العامة، ولو العيال في مدارس خاصة عادية تصل مصاريف المدارس مع الدروس لخمسين ألف جنية في السنة، ولو مدارس خاصة أجنبية لن تقل مصاريف الثلاث عيال مع دروسهم عن مائة ألف جنية في السنة، أما الدراسة الجامعية الخاصة والحكومية فحدث ولا حرج فالميزانية مفتوحة بدون سقف. الظريف إن جحافل العيال طوال السنة صيف شتاء رايحة جاية بين المدارس والدروس في سوق تعدى حجمه المليارات (إذا كان اللي بيدخلوا امتحان الثانوية العامة بس 15 مليون عيل !!!)، يا عالم ياهوه المليارات دي كلها بتيجي منين إذا كنتم فقراء؟! مافيش إجابة غير إن المصريين بيستعبطوا وكهنة وبيدّعوا الفقر.
هل المصريين بيستعبطوا؟ هل المصريين كهنة وبيدّعوا الفقر؟ آه هما فعلا كهنة وبيستعبطوا لأن حسب الإحصائيات السعودية فإن أكبر عدد معتمرين في العالم كله يأتي من مصر (أكثر من ستمائة ألف معتمر في السنة) أكثر من دول تعدي مسلميها المائة مليون مثل إندونيسيا وماليزيا وباكستان والهند والصين، وهذا الشعب المؤمن المتدين هو اكبر مستهلك للحشيش في العالم وأكبر مستهلك للمخدرات المستوردة في الشرق الأوسط بحجم تجارة مليارات (أقل بقليل من حجم تجارة الدروس الخصوصية).

هل المصريين بيستعبطوا؟ هل المصريين كهنة وبيدّعوا الفقر؟ آه هما فعلا كهنة وبيستعبطوا لأن الشباب اللي قاعد على القهاوي في الثلاث الطوابق ودي من المناطق الغارقة في العشوائية والعبث وكل الألفاظ اللي نفسك فيها، الشباب دول ما شاء الله تبارك الله لابسين جزم نايكي وساعات سواتش ونضارات شمس أوكسيدو أصلي مش مضروبة، وأنسى الموبايلات فآخر إحصائيات عدد الخطوط اللي نزلتها الثلاث شركات المشغلة في مصر تعني أن المتوسط لكل مصري فوق عمر ستة عشر سنة هو موبايلين!! ...أمال أيه حكايات الفقر والبؤس والإضرابات وقلة الأدب اللي قرفونا بيها دي؟

بصراحة كده ومن خلال احتكاكي بكل اللي قابلتهم في مصر من أقارب وأصدقاء ومعارف تيقنت وآمنت أن الناس كلها مزبطة حالها على كافة المستويات وبكافة الطرق سواء حلال أو حرام لأن الحلال والحرام أصبح مصطلح مطاطي في مصر كل واحد بيعمل قانون الحلال والحرام على راحته. وأصبح متوسط الدخل في مصر مقارب للدخل في الخليج ، والكلام ده مش اعتباطي والدليل موجود ، فإذا كانت أسعار الاحتياجات الأساسية من مأكل ومشرب وملبس ووقود في مصر أعلى (أؤكد مرة أخرى أعلى) من مستوى أسعارها في الخليج بينما مازال المصريين بيأكلوا ويشربوا ويلبسوا ويشتروا سيارات جديدة بل ويسيحوا في بلاد الله فلا بد وان الدخل في مصر مقارب للدخل في الخليج. أما الفقر فأنا ماشفتش فقراء وإذا كان فيه فقير في مصر فده بسبب غباؤه ليس إلا بدليل إني لما كنت بادور على مكان لركن عربيتي الحقيرة الآفيو في شارع القصر العيني عشان أقضي مصلحة شاور لي شاويش طيب وقاللي تعالى هنا وركنت صف تالت في شارع جانبي قريب من مجلس الشعب.المهم إني قضيت مصلحتي ورجعت لقيت فيه ورقة على زجاج العربية بما يفيد المخالفة مسكتها وبصيت للشاويش وقلتله بقى كده يا حضرة الصول؟! قاللي يا بيه أنا اللي حاططها وانت نازل،انت ماختش بالك ولا ايه؟ طب بص يابيه في الورقة هاتلاقيها مكتوبة بخط اليد مافيش فيها حاجة مطبوعة عشان بس لو عدى الونش ولا حاجة تبقى محمية بالمخالفة، انفجرت في نوبة ضحك هيستيري وقررت أعطيه عشرة جنيه مش عشان كان بيحمي عربيتي لأ عشان ذكاؤه في تزبيط حاله.
إذا كان صاحب العربية الحقيرة اللي هو أنا بيديه عشرة جنيه أمال اللي راكب سيراتو ولا باسات ولا بي أم ولا مرسيدس هايديله كام؟ ألا يجمع هذا الشاويش بنهاية كل يوم ورقة بمائة جنيه على الأقل يعني ألفين ونص في الشهر غير مرتبه الكحيان يبقى يدفع قسط السيراتو ولا لأ؟ ....يبقى من حقي أصدق جمال وأحمد وعز ولا لأ يا شعب يا كهين ياللي بتستعبط.؟





مش مهم انك تغير الكون... المهم انك تخلي الكون ما يغيركش
"أسأل كثيرا لماذا
أشعر بالسعادة فقط عندما أتكلم إلي نفسى, و عرفت بعد فترة أن سبب الراحة
هو كونى الشخص الوحيد الذى تريحنى إجاباته"
الرجوع الى أعلى الصفحة اذهب الى الأسفل
 
بعد كله ده ....جنون الازمات
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات الكافيه :: الركن العام :: القسم العام-
انتقل الى:  
عدد الزوار حتى الان
free counters